Sentidu de libbertade est un’arregorta de 19 artìgulus de arkiologia, stòria e polìtiga a pitz''e sa Sardinna, a sa scoberta de sa stòria de sa terra nosta, scritus de Giuanni Lilliu e giai imprentaus in s’arribista 'Nazione Sarda' intr’‘e su 1977 e su 1981.
Sa tenta de su libru est sa de ponni in luxi s’acàpiu de su tempus passau cun su presenti, ca sa memòria, sa stòria e totu is sinnus de su passau no dus depeus pigai a 'cosa antiga' ki no serbit, ma funti categorias de su presenti e fundamentus de s’identidadi de sa natzioni sarda in su mundu de oi.
Su libru, duncas, est che unu biaxi a sa scoberta de sa stòria de sa terra nosta, unu biaxi ki tenit s’arrìtimu de su traballu lentu de s’arkiòlogu, ki bògat sa terra e su pruini de is arràstus de is bisayus nostus.
Custu liòngiu cun s’antigòriu, d’agataus prus de totu in su contu a pitz’‘e sa scoberta de is istàduas de perda de is gherreris nuràxigus de Monti Prama in Cabras, o mancai puru in s’artìgulu a pitz’‘e su scarraxu in Bidistili, in su sartu de ‘Onne, logu arricu de interraduras e de 'tumbas ‘e is mannus', aundi su pensamentu bòlat a is sardus nuràxigus, a is cerimònias po is bonànimas, cun pregadorias, brebus...
S’autori fiat nàsciu in Barùmini su 13 de martzu de su 1914. At fundau e dirigiu sa Scola de Spetzialidura de Stùdius Sardus in s’universidadi ‘e Casteddu, i est stètiu professori de Antigòrius Sardus e prèsidi de sa facultadi ‘e Lìtras e Filosofia. Arkiòlugu famau, studiau e polìtigu faidori, de su 1990 est acadèmigu de is Linceus. S’obra sua prus spainada e connota esti La civiltà dei Sardi.
Dexiotu de is artìculus de tziu Giuanni funt in campidanesu; in logudoresu funti imbècias sa presentada e sa tradusidura de La costante resistenziale sarda, totu ‘e is duus de Giùliu Paulis.
In prus, s’agàtanta trintacuatru fotografias a coloris de argumentu arkiolòxigu, ke is istadueddas de sa dea-mama, sa mama de brunzu de Orthulle’, is istàduas mannas de perda, testus, tassas e aici nendi, ki funti un’agiudu po cumprendi sa tzivilidadi de is Sardus.
Artìgulu pubricau in "Godot News" puru.
Po ndi sciri de prus:
